21/10/2022
သံသယဖြစ်ဖွယ် ငွေစာရင်းများ တားမြစ်ပိတ်သိမ်းနေ
သံသယဖြစ်ဖွယ် ဘဏ်နဲ့ဆက်သွယ်ဆောင်ရွက်နေသူတွေရဲ့ ငွေစာရင်းတွေကို ယာယီငွေသွင်းငွေထုတ် တားမြစ်တာနဲ့ အပြီးတိုင်ငွေစာရင်းပိတ်သိမ်းတာတွေကို ဆောင်ရွက်နေတယ်လို့ မြန်မာနိုင်ငံဘဏ်များအသင်းက ထုတ်ပြန်ပါတယ်။
မြန်မာနိုင်ငံဘဏ်များအသင်းဝင် ဘဏ်တွေအနေနဲ့ မြန်မာနိုင်ငံတော်ဗဟိုဘဏ်ကတစ်ဆင့် ငွေကြေးဆိုင်ရာစုံစမ်း ထောက်လှမ်းရေးအဖွဲ့က တောင်းခံလာတဲ့ ငွေကြေးခဝါချမှု၊ အကြမ်းဖက်မှုတွေ၊ ငွေကြေးထောက်ပံ့မှုတွေနဲ့ ပတ်သက်ပြီး ဘဏ်နဲ့ ဆက်သွယ်ဆောင်ရွက်နေသူတွေနဲ့ ပတ်သက်တဲ့ သံသယဖြစ်ဖွယ် သတင်းအချက်အလက် တွေကို အချိန်နဲ့တစ်ပြေးညီ တင်ပြပေးပို့နေတယ်လို့လည်း ဆိုပါတယ်။
အဲဒီသတင်းပေးပို့ချက်တွေနဲ့ပတ်သက်လို့ တရားဥပဒေစိုးမိုးရေးအဖွဲ့တွေနဲ့ မြန်မာနိုင်ငံတော် ဗဟိုဘဏ်တို့က ထပ်မံတောင်းခံလာတဲ့ သတင်းအချက်အလက်တွေကို ထပ်မံပေးပို့တာ၊ ငွေကြေးဆိုင်ရာ စုံစမ်းထောက်လှမ်းရေး အဖွဲ့နဲ့ ဗဟိုဘဏ်တို့ရဲ့ ညွှန်ကြားချက်တွေအတိုင်း သံသယဖြစ်ဖွယ် ဘဏ်နဲ့ ဆက်သွယ်ဆောင်ရွက်သူတွေရဲ့ ငွေစာရင်းတွေကို ယာယီ ငွေသွင်း ငွေထုတ် တားမြစ်တာ၊ အပြီးတိုင် ငွေစာရင်း ပိတ်သိမ်းတာတွေကိုလည်း တိကျစွာ လိုက်နာဆောင်ရွက်နေတယ်လို့ ထုတ်ပြန်ချက်အရ သိရပါတယ်။
ဒါ့အပြင် တရားရုံးရဲ့ ဆုံးဖြတ်ချက်အရ နိုင်ငံ့ဘဏ္ဍာအဖြစ် သိမ်းဆည်းဖို့ ကိစ္စရပ်တွေကိုလည်း ညွှန်ကြားချက် အတိုင်း စာရင်းပိတ်သိမ်းပြီး နိုင်ငံတော်ကို အပ်နှံတာတွေကို ဆောင်ရွက်နေတယ်လို့ ထုတ်ပြန်ထားပါတယ်။
OneNewsMyanmar
