畢氏筆記 Butt's Notes

28/09/2025

光陰似箭 日月如梭
咁就四年 快過閃電

諗住今日一家人出去貢下慶祝下，行過商場咁啱有得玩籃球機，於是就去襯下，唔覺意上咗榜，最驚喜嘅係，小畢仔人生中都唔知有冇玩過十次籃球機，竟然一行到埋去手風順到唔知點形容，最終兩父子一齊上榜，真心估唔到佢咁勁😅

19/09/2025

🚘 鵰Carriageway 究竟係咩？

要數一個喺英國學車錯得最勻循嘅概念 ，絕對係鵰carriageway 嘅定義。好多朋友無論係喺英國學車，定係喺香港揸開車再過嚟，都未必真係清楚明白咩叫 鵰carriageway。So far 我問咁多個學生之中，係得Sita 同一位眉精眼企嘅香港人朋友答得啱…

其實如果你好似我咁臀部痕癢，走去研究下英國道路發展嘅歷史，就會知道以前淨係得馬車年代，根本冇咁多公路。到後期有汽車出現，速度愈嚟愈快，就慢慢有咗 highway 呢樣嘢，之後再演變成今日嘅 single carriageway 同鵰carriageway。
而最關鍵嘅定義係：鵰carriageway 係一定要有一個明顯嘅中央分隔 (central reservation)。呢個分隔可以係石壆、花槽、欄杆，總之係一啲實在嘅建築物，清清楚楚咁隔開兩邊來回方向行車線，唔會畀你誤會揸咗去對面線嘅，呢啲先叫做鵰 carriageway。

點解咁多人會誤會咗鵰carriageway 同Single carriageway 係一條線同兩條咁解呢？最簡單嘅理由梗係照字面解Single 同 Dual 真係一同二咁嘅意思，又咁啱得咁橋真係好多時鵰carriageway 真係有兩條線，所以就好直接覺得個定義係咁，但其實佢Dual 嘅意思唔係指線嘅數量，而係指行車的方向有兩個

所以即使每邊得一條線，只要中央有分隔，佢都係 鵰carriageway。而中間無分隔嘅雙線道路，即使兩邊各兩條線，都只係 single carriageway。

點解要識分咩係 鵰carriageway 咁重要？因為英國道路分四個唔同等級，鵰carriageway 就係其中一種。當你見到 National Speed Limit Sign 呢個白底黑斜線嘅牌，如果條路係鵰carriageway嘅話，私家車嘅限速就會係 70mph。

當然啦，有啲路雖然定義上係 鵰carriageway，但因為道路環境、附近民居密度等等原因，可能會有另一個指定限速，咁就一定跟返現場路牌的指示，而唔一定係70mph。記住啦😉


#顧名思義
#係鵰兄有位喺中間企嘅公路

25/07/2025

連續講咗兩個星期教車師傅呢份工嘅壞話，咁又有冇啲乜嘢其實係我做呢份工之前，諗都冇諗過嘅好處呢？

其實都有嘅，除咗人所共知嘅人工唔太差，開工時間自由之外，我諗最意想不到嘅好處可能係不知不覺間，認識個世界多咗好多吧

畢仔係香港出世，香港長大，冇去過外國讀書，係名乎其實鄉下仔一名，雖則都會耐唔耐四圍去下旅行，但唔會有外國朋友，對個世界嘅認識只限於喺香港會接觸到嘅外國資訊

但嚟到英國做咗教車師傅之後，因為學生來自五湖四海嘅關係，識多咗好多來自其他國家嘅人，聽多咗好多其他國家嘅故事，誇張少少講，真係改變咗我嘅世界觀

一切就等我由一位我來自印度嘅學生開始講起吧，佢叫 Aanya 係一位電腦工程師，Aanya 之前喺倫敦住唔使揸車，但後來搬咗過嚟我住緊嗰個town 仔，冇車真係好唔方便，所以就搵咗我學車

第一日同Aanya 上堂，我就懶得意咁，將我唯一一句識得嘅印度話，攞嚟同佢吹水，我同佢講，我喺香港嗰時，耐唔耐都會去食印度咖哩，一定會叫呀Lu 趴啦花嚟食

可能係我發音唔準吧，來回咗幾句，Aanya 都唔知我講乜，最終都要同返佢講I mean 薯仔烤餅佢先明我講乜

Aanya:哦...你想講Aloo Paratha，我地南印嗰邊好少食，我地嗰邊通常會食Parotta

畢：咁情況？乜印度有分南北嘅咩？

一問完，我就知道自己再柒多一次，再上一次柒依啲咁嘢嘅時候就應該係仲喺香港，小畢仔就嚟出世，工人姐姐剛剛到埗，我同姐姐傾計嘅時候以為全菲律賓都淨係會講Tagalog

喺香港生活得耐，我成日有個刻板印象覺得來自同一個國家嘅人，都會講同一個語言，有同一樣嘅文化，食相類似嘅食物等等，但其實依個世界好多國家都幅員廣闊，人口眾多，就算同一個國家都好，可以因為居住地方嘅位置、地形、氣候、種族，而演變出完全唔同嘅語言、文化、宗教、飲食習慣等等，就算喺香港咁細地方，講「大笨象揸支槍去打仗」，下一句究竟係「打唔贏」定「打完仗」都可以有唔同版本，更何況人哋地方咁大，人口過十億嘅國家，就梗係山川異域，風俗不齊。

岔開講句，所以你就會明，一個地方咁大，人口咁多嘅國家，個政黨為咗方便管治，迫所有人講同一款語言，係幾咁反智嘅一件事

畢仔好幸運，啲學生真係乜人都有，又個個都肯天南地北乜都同我講一餐，逐啲逐啲講下比我知唔同地方嘅風土人情，兩年來，我直頭覺得自己好似take 咗一個異國奇風怪俗與當代政治亂局，跨文化地緣政治國際關係學初班咁

例如有一日同Anya 傾開莫迪，我話我喺新聞聽返嚟好似佢做得幾好咁喎，Anya 就話佢覺得都算唔錯，樣樣都算過得去，但印度有一樣死症，就係宗教嘅衝突，根本唔會有人搞得掂，講下講下，佢就同我上咗一堂莫迪處理國內宗教衝突方法的利與弊…

來自蘇丹嘅眼科醫生話比我知，佢喺蘇丹去唔同地方睇症嘅時候，一定要帶埋個翻譯去先搞得掂，同一個地方可能隔座山，就已經講緊兩種完全唔同嘅語言；講起蘇丹，我又唔識死咁問佢，咁無啦啦做乜會分成兩個國家？於是佢有同我上咗堂蘇丹內戰的起因與經過，及分裂後兩國的差異

上年斯洛伐克個總統差啲比人冧咗，於是我同來自斯洛伐克嘅Food production manager 上堂時就同佢講話，喂你個總統比人隊喎，佢就話條友想賣晒自己的國有資產比俄羅斯，個個都希望佢救唔返….聽佢咁講，我以為佢都好憎俄羅斯，但同佢講起俄烏戰爭，佢又話你咪聽晒西方傳媒講嘅嘢，普京係衰，但佢話係北約迫佢迫到上門口又唔可以話冇道理，跟住又同我上咗堂，斯拉夫人如何看北約東擴與他們眼中俄烏戰爭的前世今生

除咗咁heavy 嘅國家大事之外，當然都有啲輕鬆啲嘅

例如斯洛伐克嗰個學生話佢返屋企唔係飛斯洛伐克，而係飛波蘭，落咗機坐兩個鐘車就到，想滑雪的話去佢嗰頭好呀，保證比法國平一大截

來自法的學生話，如果你喺Calais 食buffet 食厭咗，想揸車入法國其他城市玩，佢家鄉里爾係一個唔錯嘅選擇

老實講，我諗住教車之前，真係無諗過會唔覺唔覺咁，從啲學生身上學到咁多嘢

教車師傅係一份好特別嘅工，我諗唔會有人細個時寫我的志願時會寫教車，亦唔會有人讀完書一畢業就想嚟教車，大部份都係人到中年，想事業上有啲變化時會諗嘅其中一個選擇，正因為咁，我諗都成為咗部份香港人嚟到英國，又好似我咁本行喺英國未必啱做嘅時候，想轉行嘅其中一個選擇，依三集嘅英國教車師傅冷暖自知日記系列，正係想俾考慮緊嘅朋友多啲思考角度，了解多啲諗清諗楚，先再決定是否適合入行，希望小弟嘅小小分享，可以幫到正喺度權衡利弊嘅你吧🤗

———————我是一條分隔線———————-

依三集英國教車師傅冷暖自知日記歷時15個月咁滯，仍然留喺度睇晒嘅你，真󠄉心想同你講聲多謝🤗估唔到吊癮吊咗你地成年，你地都仲肯等我😅

事緣年零前我開始個肚成日有啲唔舒服，搞到冇乜心情寫嘢，所以個page 冇update 成年......去睇醫生睇咗好多次，NHS 都待我不薄，可以幫我做嘅檢查都做晒咁滯，但仍然搵唔到原因，同畢太傾，佢就覺得會唔會其實唔係身體有啲咩事，純粹只係壓力搞到肚痛

於是佢就鼓勵我不如寫返個page，等我可以搵啲時間吹下水賣下假藥，放空下思緒，睇下會唔會有好轉，所以我就決定重新上路，希望繼續以戇居白痴嘅文筆，同大家一起將國事家事天下事，都共付鳩噏中，不過我都承諾大家，鳩噏之餘我都會盡力寫好每一個post，希望可以帶到一啲英國揸車嘅實用資訊比大家，等大家唔使抱住「來都來了」嘅心態先繼續留喺依個page 度😆

Anyway, Happy Friday

#香港人加油

16/03/2024

以前細個讀書讀Econ嗰陣時，有個字唔係好識讀，成日讀咗「安叉扒𦧲」

喺經濟學嘅角度，生產時需要投入一啲資源，先可以有產品生產到出嚟，依啲投入，就稱為生產要素。而其中一個要素就係Entrepreneur 企業家職能😎

畢太：妖你講就講啦，無啦啦學人拋書包，係都拋啲高深嘅嘢吖，走去拋啲中四Econ 嘅嘢，醜唔醜呀你😒

畢仔：喂，你咪篤爆我先得架😓

簡單啲講，教車其實係一盤生意，而作為依盤生意嘅老闆，你就要承受盤生意帶比你嘅風險

乜教車會好多風險嘅咩？

多囉

教車師傅係一個多勞多得、手停口停嘅工作，最簡單嘅莫過如你病咗或者架車有問題，開唔到工，就可能一段時間冇收入。

再者你收到幾多學生、個schedule full唔full、你教車教成點、reputation好唔好、能唔能夠build up word of mouth，等學生再介紹其他朋友比你，有冇一個好嘅學生即時䌓殖率等等，亦會好影響你成檔生意嘅表現

可能你會覺得，依啲都好少事啫，做咩生意都會遇到依啲問題架啦，我努力啲做好啲，應該冇嘢嘅

有冇諗過，會有機會成檔嘢要摺埋冇得做落去呢？

同嗰個所謂「一世有效」嘅「香港教師牌」唔同，英國教車師傅牌每四年就要考一次，就係所謂嘅standard check

Standard check 同考牌嘅要求一模一樣，而如果你帶去考車嘅學生表現唔係咁好，trigger 到四項監察指數嘅其中三項，DVSA 就會要你提早進行standard check。你過到standard check 當然冇問題，但如果肥咗嘅話，比多兩次機會你補考都過唔到嘅話，咁個牌就會吊銷

嘩！咁大鑊！喂畢仔，咁到底個試有幾難考架？

依個問題自從我pass 咗個考試之後，我就覺得好難答，如果我話個試超級難考架，冇人考到架，但我pass咗，咁就好似兜個圈讚自己咁，但我又好唔想懶謙虛咁話：好易考架咋，個個都考到，從而令你低估咗個考試

數據話比你知，依個考試嘅合格率大約得三成，而畢仔聽過一單奇聞，絕對能夠講到比你聽依個考試可以有幾難考

話說有一位朋友想做教車師傅，走咗去某間大嘅駕駛學校報名，於是間駕駛學院就安排咗一個ADI trainer 比佢，但上上下堂，間學校突然同依位朋友講，唔好意思呀我地要換過另一個trainer 比你，因為你原本個trainer 肥咗三次standard check，續唔到個牌….

試諗下，一個喺依個行頭做咗一段時間，公司安排佢升上神枱教新仔嘅老師傅，都會有機會肥三次續唔到牌，咁你明依個考試可以有幾難搞未？

畢仔唔識依個trainer ，唔知佢嗰三次肥喺咩原因，但我估好大可能係因為佢已經上咗神台集中教人做教車師傅，而冇乜適合帶去考試嘅學生

之前講過ADI Part 3 考試係要自備一個學生，帶佢去考官面前教一堂比佢睇，等考官評估下你嘅教學技巧，所以就算你嘅教學技巧一流，對教車嘅各項細節深諳其道，但係搵唔到一個口齒伶俐，反思能力一流嘅學生，同你一齊演譯一齣四十分鐘扣人心弦嘅學車之旅，你一樣會肥佬收場

畢仔超級好彩，我要考Part 3嗰排，最少有兩個學生我覺得係好適合可以帶去考試嘅，仲要我考試嗰日，佢兩個都得閒，我有一個可以帶去考試之餘，仲有一個可以做後備，相比起我其他一齊training 嘅同學，搵一個都有困難

個故事發展落去係好彩依位trainer 冇放棄到，由頭Part 1、Part 2、Part3 重新考過，最終都考得返個牌做得返教車師傅，但中間嗰段時間就因為冇咗個牌要迫住做其他part time 嚟維持收入，但如果佢冇堅持落去嘅話，可能就會從此喺教車依一行絕跡

講咗咁多教車依一行嘅壞話，如果你都仲未比我嚇怕，仲想研究下適合適合入行的話，不妨玩下DVSA 依個driving instructor 嘅suitability assessment：https://www.safedrivingforlife.info/driving-instructor-suitability-assessment/

我自己玩嘅時候都唔係好高分，但喺答問題嘅過程中，好可能會問到一啲你從來冇諗過需要考慮嘅事，從而比你可以諗清楚究竟依一行啱唔啱做

所謂有危就有機，教車依行的確唔易做，但如果你克服到，又會有唔少好處，放負放咗兩個禮拜，下星期等我哋唔好再悲觀，講下我成為咗教車師傅之後，有乜嘢意想不得嘅得著

————————我是一條分隔線————————

畢太：嘩老公，乜原來你分工咁蹺蹊架，真係辛苦你啦，不如今晚出去食餐好嘅慰勞下你啦

畢仔：係啦，今晚食餐好嘅，順手當做節啦

畢太：做節？做咩節呀？

畢仔：教車師傅節囉，每年嘅3月16日都係International driving instructor day 嚟架

畢太：😰

#香港人加油

#謝謝收看
#冇乜嘢嘅話我返出去先
#趕住同畢太去做節 🤭

We use cookies to collect information about how you use this site. We use this information to make the website work as well as possible and improve our services.

09/03/2024

自從喺個page 度講咗自己成為教車師傅之後，收到唔少網友嘅pm，都想問下點樣可以喺英國成為教車師傅ADI

我成日都話，我自己都係剛剛入行，唔係專家。不過好似行山咁，行過嘅路行得通，就綁條絲帶喺度話比其他人知，所以我將我考牌嘅經歷，我身上行得通嘅做法，照直講返出嚟。至於制唔制得過，份工啱唔啱你，就真係要交返比各位有志之士慢慢推敲推敲

不過好幾次同啲網友傾嘅時候，我有種感覺，覺得可能考慮緊入行嘅朋友，好多時都太樂觀，淨係睇到成為教車師傅嘅好處，收入好好，時間好彈性，自己做老闆等等等等

其實依個世界所有嘢都有正反兩面，太樂觀同太悲觀都會失卻焦點。小弟做咗就嚟九個月，不如就等我分開幾集，同大家分享下幾個我覺得考慮做教車師傅嘅時候最容易忽略嘅角度，等大家諗下究竟對你嚟講，喺英國做教車師傅係利多於弊定弊多於利

好多朋友一諗做教車師傅，第一樣一定會諗起可觀嘅收入，嘩你地收成卅幾四十鎊一個鐘，一日八個鐘頭，唔計多你嘞當你一個月開廿日工....屈指一算…嘩….發達囉

朋友，冷靜啲，假如做教車師傅唔使供車租車比franchise fee保險油錢整車維修依樣嗰樣的話，個收入的確係咁可觀，但當你逐樣減啲逐樣減啲，再扣埋稅之後，你就會發覺，其實又唔係可觀得咁緊要

再者你真係可以一日教到八個鐘？同喺香港教車好唔同嗰地方就係，喺香港就可以全部喺聖保祿醫院門口集合，一個上完就接住另一個。但係英國就通常都係師傅去你屋企接你，就當你一日四堂，每堂兩小時，中間一小時travelling time，即係話你每日開工時間可能有超過十個鐘喺架車度

又當你已經習慣咗長時間開工，甚至有啲朋友好似我咁，之前係揸巴士嘅，一日揸八個鐘車都冇問題，但你要知道，一日揸八個鐘車同一日睇人揸八個鐘車，係兩碼子嘅事

如果要用一段文字去形容一下教車師傅嘅工作，咁可能會係，你每日有八個鐘頭，將自己嘅生命安全，同一件價值以十萬計嘅生財工具，交咗喺一個對交通法例一知半解，唔係咁熟悉道路設計，唔係咁習慣睇路牌嘅人手中，依位仁兄有時會係一個手腳唔協調、成世人都冇操作機器嘅經驗，見到對頭車會突然緊張，硬係歡喜轉彎前開開個水撥嘅人，而佢將會舞住依架成噸重嘅機器，以介乎20-60英里嘅速度，喺英國交織着古跡同現代建築嘅大街小巷，條中線若隱若現嘅county road，時速限制仲高過吐露港公路嘅鵰carriageway，複雜而充滿變化嘅Roundabout入面左穿右插， 激情地與你一起渡過佢地人生之中無數個第一次…

仲要唔好忘記，喺依八個鐘入面，唔可以恰眼訓、用電話就基本，更加要一眼關七，𥄫實路面嘅情況之餘，再要𥄫實個學生有冇𥄫實你想佢𥄫實嘅嘢，隻手隻腳擺得啱唔啱位；與此同時再好似先知上身咁預計將會發生咩事，然後喺電光火石之間，決定要出聲提佢吖，抑或出手扶佢堂軚，定係直頭踩brake踩停佢

就當你本領高強，扭盡六壬完美地阻止咗一場交通意外發生，但嗰頭經歷完死神喺你側邊擦身而過，依頭就即刻要定過神來，諗下點樣可以喺唔傷人自尊心又唔影響課堂氣氛嘅情況底下，傾返頭先發生咩事

又因為DVSA 覺得client-centred learning 係對學生最好嘅教學法，最能夠鼓勵學生掌控自己嘅學車過程，及建立終身學習精益求精嘅駕駛態度，所以縱然你想講，喂，你係咪痴Q咗線呀，咁揸車都得嘅？你咁樣遲早撞L死人呀！

請不要這樣說！
而要試著說
「um….你見唔見到剛才發生咩事呢？」
「係…冇錯，我哋差啲撞死人，咁你想唔想撞死人呢？」
「冇錯，我好認同你唔想撞死人依個睇法」
「咁你覺得如果我地再遇上同類事情發生，我哋要點樣做先可以唔使撞死人呢？」
「你講得啱，我地下次咁樣做就應該唔會撞死人啦，咁我可以點樣幫到你呢？」
「好，咁我地一於就照剛才我地傾出嚟嘅策略去嘗試下避免撞死人啦，Let’s drive on when you’re ready ⋯⋯」

可能你會話，食得鹹魚就要抵得渴，依啲我頂得順，淨係唔使幫人打工，自己可以安排開工時間等等所帶比我嘅自由，已經可以令我忘卻係啲煩惱

真係？😏

朋友，會唔會係你太樂觀，只係睇到自己做老細嘅好處？唔好心急，且讓我下週再為大家娓娓道來

#香港人加油

03/02/2024

開始教車之後，耐唔耐就會聽到啲師傅話自己個學生考車0 fault 咁返嚟，我一直都好羨慕，一直都唔知道點教先可以咁勁，教到個學生出去揸車揸四十分鐘，可以無可挑剔咁返嚟

早排有個local 師傅仲係我地town 個driving instructor WhatsApp group 度分享，話佢今次威威啦，因為佢有個朋友對仔女學車，搵咗佢教，一仔一女前後兩日去考車，兩個都0 fault 返嚟，佢今次真係對個朋友有所交代啦咁話

我心諗有冇咁勁呀，仲諗緊使唔使搵佢傾下計，誽佢教返我一招半式看下門口

殊不知好運真係話嚟就嚟，一個平凡的工作天，帶咗一個自稱好平凡的女士Mabel 去考試，冇乜特別大期望下，迎來我第一個0 Fault 🎉

返到嚟，考官冇出聲，淨係問Mabel 想唔想等埋driving instructor 嚟先開始debriefing

衰過一次嘅Mabel 以為自己又衰咗，垂頭喪氣咁叫我埋去，我離遠見到Mabel 面色蒼白咁都以為冇好嘢

點知我一上到車，考官話我真係恭喜你呀！你pass 咗，仲要喺0 fault 添，我專登等埋你師傅嚟先公佈依個消息比你聽

Mabel 幾秒內由唔想信到欣喜若狂再喜極而泣

我就係旁邊港女咁嘅口吻：真係架真係架，你好叻呀！🥳

Mabel 學車條路一啲都唔順，廿𡃁歲時學過一排但有咗BB 之後冇時間學就停咗，南柯一夢十幾年後已經係三孩之母，下年大仔就要上中學，佢好想可以揸車送仔返學，所以上年就的起心肝重新再學過

可惜同上一位師傅唔係咁夾，學到好無癮，所以就想轉師傅，但須知道而家搵到個師傅有位收新學生嘅真係一啲都唔易，咁啱我早排開始實習時學生唔多，公司就彈咗比我跟

上完頭幾堂，Mabel 已經掹咁同我講，喂畢仔，我覺得你教得好好呀，好多嘢我之前個師傅唔係咁教，但我覺得你講嗰套好易明，好清晰，你直頭令我重新愛上揸車

雖則聽到嘅時候係開心嘅，但嚟到英國後我養成咗一個習慣，逢襯比人讚嘅時候聽八成至一半就夠架啦，因為英國人真係覺得你呼吸呼得好優雅都可以讚一餐，滿口客套說話根本就係佢地文化嘅一部分，一日未修成正果，我都唔知自己係咪真係教得好，所以今劑Mabel 0 fault 返嚟，真係好似同我打咗枝強心針咁，自信心大提昇

送到Mabel 返屋企，佢仲未喊完，原來因為佢好驚會再肥，所以上次同今次都冇同人講佢考車，淨係得佢老公知道，所以真係喜出望外到外太空，於是我就同佢講，咁你唔好喊啦，因為從今日起你成為咗考車嘅人之中最勁嗰1.1%，從此你不再平凡，快啲抺乾眼淚然後將依個消息公告天下吧！

#香港人加油
#各位要學車考車嘅都加油

26/01/2024

今日Book 滿晒堂，唔係我都出去聽下鋼琴演奏🤭

No CCP at the piano today 😎

16/01/2024

畢仔人生之中，唔知點解幾次學車，都好好彩跟著啲好老經驗嘅師傅，今次喺英國考師傅牌跟著Martin，當年喺香港學揸巴士嘅時候，個師傅都係一個好有經驗嘅巴士教車師傅，佢姓翁，喺對面海間公司教車教到退休後，再過嚟依邊翻閹，咁啱我就跟著佢

翁師傅係一個好nice 好有禮貌嘅人，平時喺廠見到高層又好清潔嬸嬸都好，都一定十分熱情咁打招呼

翁師傅不單止見到同事有禮貌，喺馬路上面揸巴士都一樣咁有禮貌，亦要求我地要對其他道路使用者都要有禮貌，如果有人讓咗我地，就一定要閃一兩下死火燈示一示意，如果情況適合嘅話最好就直頭遞一遞手say 聲thank you，佢形容依個動作為”比五蚊佢”

同張五常寫賣桔者言之前真係喺維園賣過桔一樣，翁師傅作為道路禮貌運動”比五蚊佢”嘅推手，佢都真係曾經試過比五蚊人

話說好多年前，一個風和日麗嘅下午，翁師傅帶住個巴士學神出去操車，駛到去一條比較窄嘅路，遇上咗一位的士司機，停咗架車喺路邊，翁師傅覺得唔夠過，就叫個師兄停低等架車，等的士駛走先

等咗成分鐘架的士都唔郁，於是師傅就叫個師兄落車同個的士司機講聲，請佢行個方便駛前少少

好可惜嗰位的士司機大佬正喺度搵告東尼同摩加利度緊條3T 點砌，喺架車度瞄咗嗰個師兄一眼之後就關仁隱士，繼續讓佢嘅思緒翱翔於節節領先之中

師兄無功而還上返架巴士，翁師傅就話咁呀，唔緊要，你同我上去架的士度，比錢叫佢落旗駛前廿米，咁啱當年的士起錶價錢就係五蚊，於是個師兄就上咗架的士，比咗五蚊個的士司機，叫佢駛前廿米

隨後翁師傅就揸住架巴士緩緩喺架的士旁邊駛過，師傅話佢本來想同個的士司機講，的士佬，扮咩有性格吖，比幾蚊你你咪又要乖乖聽話，我叫你去邊就去邊，好聲好氣請你幫幫忙你又唔領情，係要人使錢去侮辱你，為咩呢？咁當然師傅梗係冇講出口啦，只係拋低一個輕蔑嘅眼神，接返個師兄就走咗

雖則我都唔明師傅點樣可以用一個眼神傳達到咁複雜嘅訊息🤣，但佢話其實依啲都唔係重點，重要嘅係我地要明白，馬路上要互相尊重、互相認讓，尤其我地揸搵食車，下下同人霎氣問候人地娘親，然後喺路中間僵持不下小事化大，大家都冇著數，多啲遞下手”比五蚊人”，大家好嚟好去又唔使錢嘅，依個世界係強者先可以收放自如，但弱者就往往死不認輸，永遠自己啱晒人地錯晒，到頭來終有一日會自食惡果

師傅嘅教誨我銘記心中，尤其過到嚟英國之後車多路窄，成日會遇到meeting with oncoming traffic 嘅情況，我都實會眨下燈或者遞遞手比五蚊人，say 聲Thank you

不過Training 嗰排有日同Martin 傾開依個話題，佢就話如果個學神仲未考到牌，最好就叫佢乜都唔好做

點解係咁重門面功夫嘅英國都會叫你乜都唔好做，同人示意say 聲Thank you 都唔好呢？原來背後係有啲原因嘅

喺英國最經常見到，向其他人示意讓路比佢或者say thank you 嘅方法有三種，一係眨一兩下車頭燈，一係眨一兩下死火燈，一係遞一遞手”比五蚊佢”，但如果細心睇Highway code 嘅話，三種方法都唔可以說得上係正統嘅做法

先講眨車頭燈，Highway Code rule 110 講到明Only flash your headlights to let other road users know that you are there. Martin 話簡單啲講即係warning of your presence，但都知道大家習慣晒眨車頭燈就好似係代表讓人咁，所以rule 111 就再寫清楚啲Never assume that flashing headlights is a signal inviting you to proceed. Use your own judgement and proceed carefully.

至於死火燈，Rule 116 就清楚指明係用嚟話比人聽你會temporarily obstructing traffic，或者係Motorway 上面話比後面嘅車聽前面有危險⚠️，絕對唔係用嚟道謝

咁遞一遞手比五蚊人又冇乜嘢啫，點解都唔好做呢？皆因Rule 160 話開車時雙手應該盡量要揸實軚盤，而且Rule 195 亦有講唔可以揚手催行人快啲過馬路，學車期間或者考試嘅時候，師傅或者考官會幫你代勞，為免瓜田梨下比Examiner 誤會你係wave 人快啲過馬路，所以最穩陣嘅做法都係乜都唔做

Martin 話學神考到牌之後，可以同佢分享下一啲大家已經約定俗成嘅做法，等佢明白其他人做緊乜，但跟唔跟就悉隨尊便

有啲人為咗確保隻手唔好離開個軚盤又可以同人say thank you，於是佢地就由比五蚊人改為比一或兩蚊人，手繼續握緊軚盤純粹遞起一兩隻手指，久而久之，就有人整咗圖中嗰個產品出嚟

早排仲揸緊巴士嘅時候，有日喺休息室冇啦啦Richard 哥部電話彈咗依個廣告出嚟，佢即刻攞出嚟比大家睇

Richard：嘩乜原來有啲咁嘅產品過喎，你話使唔使建議比公司，每部巴士都整一個吖嗱
Angela ：梗係唔好啦，你知Derek 份人架啦，咁污糟，點知佢會唔會攞嚟做第二啲嘢呀
Derek：哦咁你唔使擔心喎，我個窿冇咁大，擺唔落喎
Angela：嘩頂Derek 你咪咁核突啦，有其他女同事喺度架
Derek：吓我講緊我個鼻哥窿咋喎，你諗咗去邊呀，you are such a bloody dirty minded witch

24/12/2023

畢仔一家祝大家聖誕快樂，新年進步

考完試後一直忙碌，冇乜時間出post ，趁住聖誕乘機唞唞，一家人南下去咗探朋友，新年過後先開始再同家講下關於英國揸車嘅小知識🤗

#香港人加油

01/12/2023

一返到嚟，Sita 臉如死灰，兩個Serious ，9個minor😱

我完全冇諗過會係咁，本來諗好咗一大堆恭喜說話而家要即時轉channel改為呵返安慰說話，都搞到我有少少措手不及

不過哭波喪之前，都要聽清楚examiner 講依兩個Serious 點嚟先有得同佢傾，喺依兩個Serious 之中，我覺得其中一個係因為Sita 唔熟路所致，所以冇乜好傾，但另一個係話佢上鵰Carriageway 嘅時候行得太慢，用時速30幾去Join in 一條其他人行緊70嘅路，而且仲有三個minor 都係因為揸得太慢，咁就一定係Sita 問題，死因非常明確

問返Sita 咁你做乜揸咁慢呢？佢話佢噚晚睇咗條YouTube 片，個YouTuber 分享佢自己考車嘅經歷，話考試嗰日只要記得extra conscious, extra slow 就可以了……🤦🏻‍♂️

以前喺香港教書嘅時候，我諗好多同工都一定認同，最憎聽到嘅一句說話一定係：喂阿Sir/Miss 我出面個補習老師唔係咁講架喎！

有時人就係咁得意，明明係你教緊佢，但就硬係要聽其他人講嗰啲先係真理…..🤷🏻‍♂️

你要明白，有時教你嘢嘅人如果係熟悉你程度嘅話，一定係用一句你聽得明嘅說話去解釋一啲你唔明嘅嘢比你聽，而唔係好General 咁講解嗰件事，咁顯而易見，依兩種講解同一件事嘅方法，一定唔多唔少有啲出入，咁究竟邊個啱邊個唔啱呢？根本就冇得比較亦唔會有答案

再加上如果係喺英國學車嘅話，個變化就可以好大，跟Martin 上堂嗰排，佢講咗一句至理明言，This is Britain, in between the fine line of right and wrong, there is a very large grey area where everything depends. 如果你喺英國學過車，你就會知道，基本上所有規矩或指令後面都加多句When it’s safe to do so. 所以你問我，某一個情況下應該點揸？基本上真係冇乜可能喺一個post 𥚃面講得清清楚楚，Sita 嘅經驗就話晒比你聽，喺YouTube 講駕駛技巧已經隨時害咗人都唔知，更莫講話喺page 度純文字描述，實在難過登天，講啲唔講啲隨時唔覺意誤導咗人，所以咁就不如唔好講

或者你會問，吓？咁即係喺英國學車唔應該睇YouTube？咁我又唔係咁嘅意思，因為有時有啲concept 用影片表達的確會有幫助嘅，但千萬要記得，睇清楚製作影片嘅人係唔係ADI 或者PDI，定係純粹一個經驗駕駛者分享經驗，兩者可以有好大分別

小弟就真係唔會有時間心力技術開YouTube Channel 架啦，但如果真係學緊車，或者香港雪藏牌嚟到想鑽研下嘅話，其實YouTube 上面都已經唔只一條廣東話嘅英國駕駛知識嘅頻道，有需要的話搵下實會搵到，至於畢氏筆記專頁，就會集中睇下有無乜嘢關於英國學車考筆試嘅話題，我又覺得文字都講得一清二楚嘅，就會喺度同大家研究下

Sita 不單止叻女，心理質素都好好，衰一次金金地嘅不單止冇打沉佢嘅意志，繼續好努力咁練車，仲日日睺住DVSA 個網睇下有冇其他人Cancel 嘅期，又比埋錢用搶快期app，卒之肥完之後一個月都唔夠就比佢執到個快期，Take 2 如願過關🎉

Sita 依一Pass 對我絕對意義重大，除咗比我知道我真係有能力教一個新手教到考到牌，令我信心大增之外，仲要因為佢肥嗰次我仲係PDI，所以肥咗都冇影響我，反而Pass 嗰次我就已經正式成為ADI，仲要到而家為止，我都只係帶過佢一個去考試，所以喺DVSA嘅數據上，我仲係一個passing rate 100%嘅教車師傅，甚有啲護級球隊贏第一場聯賽暫居榜首嘅感覺😎😆

26/11/2023

有一位網友 pm 我，問咗一啲關於英國揸車嘅嘢，傾傾下，依位網友就話，喂你不如直頭喺個page 度講下駕駛技巧啦，咁好似仲實際喎

小弟認為此事萬萬不該，點解呢？箇中原因，等我從我一位學生嘅親身經歷講起

我個學生叫Sita，BBI，印度中產二代，名牌大學畢業，高尚職業，公司調咗佢嚟我依頭做嘢，比埋宿舍佢，所以喺自己原本住嗰度學咗十個鐘左右就搬咗過嚟，係我住嘅Town 仔繼續搵師傅學落去，咁啱公司就射咗比我跟

Sita 可算是我嚟到英國之後見過最醒目嘅local，所有嘢都一講就明，再加上佢細個嗰時有打開波，眼、手、腳都好協調，大部分動作練兩嘢就做到晒個要求，比份Show me tell me 佢直頭唔使同佢溫，下堂返嚟就已經背書咁背返晒出嚟，完全feel 到佢嗰股學霸嘅氣場

Sita 第一堂上堂時已經同我講，公司半年後要調佢去隔離鎮office，但個宿舍就係返而家依度，相距有半個鐘車程，所以佢要儘快考到牌，等佢可以揸車返工，但係搞笑在佢喺我地依度又book 唔到考期，只係Book 到喺隔離鎮考，所以佢就諗住搏一搏，學晒所有嘢後去一個陌生嘅地區考車

我一聽到其實覺得冇乜可能，雖則DVSA 成日都話你如果已經準備好考試嘅話，係應該所有情況都能夠駕馭到，去邊到考都冇問題，但實情係點當然阿茂都知，梗係越熟路越好

不過上咗兩三堂之後，我見Sita 咁fit，開始相信佢係有機會搞得掂嘅，於是我就諗住送佛送到西，同Martin 傾傾Sita 個case，睇下可以點幫佢，Martin 即刻彈咗隔離鎮一個教車師傅嘅contact 比我，叫我搵佢指點下迷津，帶我行下嗰頭啲考試路線，有乜陰濕位等等，我學完晒之後再專登有幾堂帶Sita 過咗去練，希望儘量幫下佢

講真我自己真係好比心機教Sita，一嚟咁醒目嘅學生真係可遇不可求，嗰種一講完一練跟住佢就做到個要求嘅澎湃感覺，真係唔係個個學生比到你，二嚟因為我剛入行冇耐，本身都冇帶得到幾多個學生去考試，而Sita 算係我第一個由好開初階段教到佢考試嘅學生，好想知自己係咪真係有能力由白紙一張教到人地Pass，所以我都幾緊張佢考唔考到

喺隔離鎮仔練完幾堂之後我覺得Sita 真係揸得唔錯，係有機會得嘅，而佢自己就更加充滿信心，諗住實一take pass，返去可以寸佢嗰個考咗四次先pass 嘅家姐

考試當日Sita 仲話自己做足英國坊間流傳女士考車必殺技，紮咗條馬尾嚟考試，仲有信心到買咗份禮物仔，考試前就已經送咗比我

考試時我本來想跟埋車出去，但Sita 話如果我坐埋喺後面佢怕會太大壓力，所以就叫我唔好跟車，如是者我就如一個新手爸爸喺產房手術室門外等一樣，喺DVSA 試場個waiting room 度，等咗漫長嘅四十分鐘...

09/11/2023

勢估唔到我係英國第一場入場睇嘅英超球隊，竟然係睇阿記...

有朋自遠方來，留係倫敦得幾日，雖則我地兩個都唔係阿仙奴fans，但時間夾得到又有啲睇頭嘅就只有依一場，咁唯有將就下...

明明西維爾係幾屆西維爾盃嘅冠軍，但竟然毫無還擊之力，比阿記㩒住砌輕取兩球...

難得入場睇波，本來好想做一樣好白痴，我細個時喺香港入場睇波嘅時候會做嘅事，就係臨完場嘅時候大叫跟隊...

但人老咗完場時有啲急想去廁所，咁就冇咗件事...😅

總括嚟講，場波係好睇嘅，氣氛亦好好


#好多都聽唔明
#只係聽到六七成
#淨係得一句我成句聽得明晒