UNIDADE GALEGA DE TRANSPORTISTAS
En prol da unidade de acción e dignificación do sector, a eficaz defensa dos seus lexítimos intereses e a súa modernización en sintonía coas novas necesidades loxísticas da economía galega Logo de varios meses de conversas, un grupo representativo de transportistas galegos procedentes das distintas provincias e comarcas de Galicia reuniuse o 22 de xuño de 2024 nas aforas de Santiago de Compostela para constituír formalmente VIEIROS UNIDADE GALEGA DE TRANSPORTISTAS, a nova asociación das pemes e autónomos de Galicia que realizan transporte por conta propia e cos seus propios medios que, no contexto actual, nace no seo do sector para impulsar a defensa dos seus lexítimos intereses profesionais desde as seguintes coordenadas:
- A defensa da libre competencia como base para a xeración de riqueza mediante a rendabilidade desta actividade económica construída desde a profesionalización, a innovación, a harmonización fiscal e sociolaboral e unha sustentabilidade realista.
- A denuncia e combate con firmeza das prácticas de competencia desleal no sector.
- A modernización do sector en todos os seus ámbitos é a receita para enfrontar do xeito máis solvente os novos retos e desafíos que esixe a economía e a loxística do presente e futuro, e isto só é posible achegando novas ideas e novos referentes.
- A dignificación do sector e dos seus profesionais cuxa actividade é esencial para o bo funcionamento da economía e a sociedade do benestar.
- A rendabilidade das pemes e autónomos do transporte debe sustentarse na profesionalización, a innovación, a harmonización fiscal e sociolaboral e unha sustentabilidade viable no horizonte do 2030, no seo dun marco tributario razoable e contido no tempo e unhas infraestruturas modernas e adaptadas ás necesidades dos vehículos e dos profesionais do sector. Así mesmo, VIEIROS aposta decididamente pola unidade de acción das organizacións do sector que teñan como principio primordial a defensa dos intereses dos pequenos transportistas galegos como mellor garantía de facermos máis eficaces as nosas demandas, reivindicacións e actuacións.
